Una granda ipocrisia.

Co se nasse, tuti bei;
co se se marida, tuti boni;
co se more, tuti santi.

Ve ricordeo de sto provèrbio? L’era pròpio cossì che se diseva, e tanti i lo ripete ancora incó, mia vera? Alora, ’desso, con tuta la serenità e la calma del mondo, fermeve de leser, e penseghe sora.

• • •

Gaveo bel pensà? Zela o no zela mia la pi granda ipocrisia del mondo?

Se no la gavé capida, ve spiego. Scominsiemo co i putei pena nati. Tante volte, co ghen vedemo uno, sia fiol de’n parente o de’n sémplice cognessido, i ne lo mostra co la sòlita frase: ‘Varda che bel el tatin dela ...!’ E, squasi sempre l’è poco meio che na bestioleta, mia vera? Mi me ricordo de uno che’l pareva un simiotin, o meio, na simiotina, parche la zera na tatina, ma tuti, in torno, i ghe diseva che la zera pròpio bela, par non dir belìssima! Pol esser che sia par sudission, par rispeto o par creansa, parché tuti i dise lo stesso, che l’è propio bel, o i tase. Pochi i ze quei che i ga coraio de dir la verità, de darghe na peada ntela ipocrisia dela gente, e dir quel che i pensa:

— Orpo, che bruto che l’è sto putel! O,

— Can del bao, el par un simiotin!

E de quei che i se marida, dir cossa? Tante volte, se sà che un che l’è par maridarse l’è un trapel, un sensavoia, un che no’l ga gnente de bon, par non dir un ciuchetela o un lasaron. Ma chi che ga coraio de dirghe a la tosa, a la futura sposa, la verità? Nissun ghe dise gnente, o, pègio ancora, i ghe dise che l’è un bon fiol, che, dele olte, el beve anca na s-ciantina depì dela misura, ma che l’è na bona persona, na persona par ben, o sia, un bon omo! E stesso sucede co la tosa, in relassion al so futuro marì. Tuti i la loda:

— La ze na bona tosa, laroadora, responsàbile, neta, la sà far de tuto, ..., — quando se sà che, se i la assa, la dorme fin al mesdì, che la ze na sporcaciona de corpo e de spìrito, che la ze na slandra, par non dir na putana! Anca sora sto afar, pochi i ga coraio de dirghe, al futuro imbroià — lu o ela — la sacrossanta verità, mia vera?

E quei che more, alora? Zeli mia deventadi tuti santi, pena morti? Par delinquente che un el sia stà, ntel casson, l’è un santo! Mi me ricordo che, ani indrio, ndando a na serimònia de pré-sepolimento de’n colega, de corpo presente, nte na ciesa de una de quele religion ben strambe, go assistio una procission de persone che le ndeva ntela testiera del casson del morto, e le ghe feva na litània de lode, una meio del’altra. Dopo sete o oto discorsi de lodassion de sti basapié, mi ghe go vardà a la persona che me acompagneva, e ghe go dito:

— Ciò, caro, se gavemo sbaliadi de ciesa, questo no’l ze mia el professor che semo vegnesti assister el sepolimento, questo l’è un galantuomo!

Mi me go alsà par ndar via, ma lu el me ga dito:

— Séntete, caro, l’è questo sì, mi go visto ntela cartela tacada ntela porta dela ciesa!

— Orpo de’n cagn!, ghe go rispondesto mi, almanco dopo morto l’è deventà un omo par ben, no ghe ze nissun par cobrarghe i dèbiti, o par dirghe qualche verità a brusapel, come el se la meritaria, mia vera?
Alora, me go sentà nantra volta e gavemo spetà che finissesse la serimónia, par ndar saludar la so fameia — moier e fioi — che, par el tanto che gavemo visto, no i cognosseva mia el morto tanto come lo cognosseva mi. E, par dir la verità, sèrino ndadi par farghe un omàgio a la fameia, no a lu, che l’è sempre stà un trapel, un vagabondo, un vero malandro, come se dise in portoghese.

Pitosto che viver sento ani a stento, vìverghene solche sinquanta, ma contento!

Nissun restarà par semensa.

Ogni tanto vien fora na notìssia: ‘No se deve magnar questo, no se pol bever quelo!’ Pure bale, no sté créderghe. Par dedrio de ste novità falsamente sientìfiche ghe ze dei interessi de grande imprese, de trusti internassionai, che i ne frega sempre, come e quando ghe par meio a lori.

Ve ricordeo quando i ne ga proibìo de magnar butiro? La notìssia: ‘El butiro el fa mal, el causa questo e quelo!’ Saveo parché? Parché i voleva che se magnesse margarina, sta inmondìssia che i la fa lori nte le so fàbriche! Ma mi ve domando: ‘Lori, tanto i paroni dele fàbriche de margarina, come i mèdeghi che, par soto via, i guadagna qualche scheo par proibir el butiro, màgneli sta sporchìssia?’ Nò, cari, lori no i ze mia stùpidi, lori i magna butiro, e de quel bon! E gnanca mi no magno margarina, posso esser póaro, ma nò cossì tanto coion! Mi magno butiro, e la margarina ghe la dago ai cagni!

Dopo i ne ga proibìo de magnar ovi. La bagna, la grassa de porco, alora, gnanca pensar! Ve ricordeo? I mèdeghi, un pi papagal che l’altro — co uno el dise na cosa, i altri i la ripete —, i la gaveva su col colesterol. El colesterol, l’era in moda. Dopo, sonti mi parché, i ga liberà i ovi: se pol magnàrghene uno e anca due, ogni tanto. Bale, cari, bale! Non vui mia dir che se ghen magne na stomegada a ogni di, ma un ovo, ogni tanto, el fa ben. E se lo fé frito ntel butiro, ben consà — co na presa de sal, nantra de pévero pena masnà, un dent de aio taià fin come la carta e le foiete de’n ramet de timo —, l’è un piato de prima qualità, màssima se gavé a man un corneto de pan pena fato, par magnar insieme!

Sti ani, in colònia, se cosineva tuto co la bagna, na bagna sana e odorosa, fata a casa co se copeva qualche porsel. De oio se ghen cognosseva solche due sorte: quel de rìssino, che se’l beveva na volta al ano, par netar fora de budele, e quel de oliva, l’oio bon, che se’l dopereva pi par remèdio che par altro. Sol i pi siori i dopereva altre sorte de oio, e solche par consar la salata. I siori i dopereva oio de mìlio, o de riso, o de rosegoti de coton. I altri, o sia, i pi tanti, i conseva la salata co la panseta — chi ghen’aveva — o col lardo, taiadi a tocheti e friti nte na padela, e dopo mescoladi con sal, pévero e aseo. E nissun gaveva sto maledeto colesterol, o, se’l lo gaveva no’l ghe ga mai causà gnessun mal. Se moriva de vècii! Tanti i riveva ai otanta e anca ai novanta passa ani, e ’l colesterol che’l ndesse farse ciavar!

Adesso, invesse, fora par le colònie, magnando sta sporchìssia de margarina, par consìlio dei dotori, doperando oio de soia — che l’è cossì rugno e spussorento che mi no ghe lo dò gnanca ai cagni! —, le persone le more zóvane, con quaranta o sinquanta ani, e dele olte ancora meno. I more tuti de’n brutomal, de cànser! Sicuro che no l’è mia par causa dela margarina o del oio de sòia, ma par via dei maledeti veleni che i ghe dà su ai pomi, a l’ua, al mìlio, al formento, … E ’lora, cossa zelo che copa: i ovi, el butiro e la bagna o i agrotòsseghi? Fàssile risponder, mia vera?

Magnar, ghe vol magnar; bever, ghe vol bever! Questa si la ze na verità sacrossanta. E ’l magnar se lo fa con quel che ocorre, mai pensar se’l pol far o no far mal. Quel che se magna el ga de ’ver saor, el ga de ’ver gusto, el ga de esser bon de magnar. Se la risseta la dise que ghe vol bagna, se ghe mete bagna, se la dise che ghe vol butiro, se ghe mete butiro, se la dise che ghe vol càperi, se ghe meti i càperi, se la dise che ghe vol zaferàn, se ghe mete el tanto de zaferàn che ocore, se la dise che ghe vol oio bon, se ghe mete oio d’oliva stravèrgine, de quel pròpio bon.

E’l vin? No’l ga mai fato mal a nissun. Sicuro che, bevéndoghene massa, se pol far la ciuca e far, par via de conseguensa, qualche stupidàgine, ma un o due bicieroti a ogni pranzo, el fa ben, el giuta la digestion. Ma vardé, no sté far colomia col vin! Bevé solche de quel bon, che, magari, el costarà na s-cianta depì, ma vale la pena. E mai desmentegar el provèrbio che gavemo imparà dei nostri vècii, che i ga vivesto squasi sento ani: L’aqua la smarsisse i pai; el vin el fa cantar!A mi me piase cosinar, e, a casa mea cosino mi. I è ani che fasso el cogo tuti i di, meno se son magagnà, parché alora cosina la Elisa, me moier. Nte i magnari che fasso, ghe meto dentro tuto quel che ocor, sensa badar el tanto che’l costa e gnanca quel che i dise i dotori. Se pol far qualche sacrifìssio, qualche sparagno in altre cose, ma nò ntel magnar, mai ntel magnar. Ntel magnar no se pol far colomia. Quando uno el me dise che no’l fa questo o no’l fa quelo parché l’è caro, parché el guasto l’è grando, mi ghe ricordo due provèrbii che me poro nono Tòfolo el li diseva sempre che ocoreva: 1) ‘Se anca le cose le va mal, el corpo no’l ga de patir!’ 2) ‘El casson no’l ga scarsela!’, o sia, de sta vita no se porta via gnente. Magnar mal, cari, l’è el pègio patir del mondo!

Na ciàcola, sol par scominsiar.

Se te pol ndar par na strada,
no stà ciapar el sentier.

Quei che, come mi, i ga setanta passa ani, i ga de ’ver sentio tante volte, dela mama, del pupà o dei noni, na racomandassion che, se anca lori i ne la gavesse dita co le meio intension del mondo, la ze responsàbile par el modo imbalordio come se gavemo slevadi e come gavemo vivesto fin adesso. Come lori i se gaveva slevadi e i gaveva vivesto cossì, parché anca i soi genitori i ghe gaveva fracà in testa sta stupidàgine, e i penseva che i gavesse intivà, che i gavesse portà la vita come la deve esser vivesta, i ne diseva pi che meno cossì: “Quando uno el nasse, el SioreDio el ghe ofre l’oportunità de scòlier fra due sorte de strade: un sentier streto, pien de sassi, de spini, de dificoltà e de soferense, che’l ghe farà partir come le bèstie par percórerlo, ma che’l lo portarà a regno de Dio; e nantra, na strada bela e larga, con tute le comodità e la giòie del mondo, ma che, sensa dùbio, la lo portarà drito drito a l’inferno!” E, noantri, stùpidi, come i gaveva fato lori prima, gavemo sielto la prima! Lori, pori coioni, i ga patio e i voleva che anca noantri patìssino, nò parché dovéssino sofrir, ma par garantir el regno del siel! Pori stùpidi lori e pori stùpidi noantri. Se gaveva de ’ver scoliesto la seconda e gòdersela fin che se vive, parché dopo morti no se gode pi, ve garantisso mi!

No stà zolar come na farfala,
se te pol zolar come na rondinela.